Tsonhnhó:wane
Tsi iotsistohkwarón:nion kontswátha ne tsonhnhó:wane kahwà:tsire, taiethinón:weron tsi shékon tkonnétha kí: kénthon awén:ke.
Hannah Claus tánon Kaia’tanó:ron Dumoulin Bush
Teionihtiohtià:kon, 2026
Hannah Claus tánon Kaia’tanó:ron Dumoulin Bush, Teionihtiohtià:kon, 2026
Karahstá:nion kaio’tén:en
Kowá:nen tsi karáhston ne ahsonhtà:ke, Teionihtiohtià:kon Hannah Claus tánon Kaia’tanó:ron Dumoulin Bush iotiráhston, kaneniarihton ahsónhta ienhsatkátho ne Onkwehón:we akohéhta ákta ne Onkwehón:we rotinonión:ni Henry F. Hall tewakarén:re, teiohswathéton tsi kahiatón:nion tsi niiawénhsere tsi tekentstén:rote ne kanatowá:nen tsi teiohkwatasé:ton ne ohné:kanos tánon tsi ionontá:here ne kawé:note.
Ne ahsonhtà:ke karáhston tóhka tsi ní:ioht tsi enhsatkátho, akté:shon naontá:ien tsi aiekaén:ion, é:neken tsi aontaiontkátho, kwah tokén:en iekaén:ions, tsi nón:we ne shaoié:ra ia’teieká:nere. Tenion’tkahrinéshon nia’tékon tsi ní:ioht tsi nón:we na’taié:ta’ne, ne karahstá:nion enhsáttoke tsi tekení:neren nahò:ten kahiatón:nion, iah tha’tekákhen tsi nakarihwé:son tánon aionaktó:take. Tsi nikaieron’tó:tens tánon watahsatáhrha roti’nikonhrá:reks iethihsothókon, tánon ne ótia’ke awén:ta tsi tiotsistohkwarón:nion nienhén:we, enkáhsere ne Karonhiá:ke tiakoia’tén:en akoratskén:ta tsi teieronhí:ia’ke ne awehiaráhtshera tánon tóka’ tsi nientsá:wen’ne.
Ne ratiráhstha tekonhwanonhwerá:tons ne tsi ionaktó:ton tánon ne konnónhnhe ne kaieron’tón:ni ne kénthon. Ne e’tho í:kare ne tiotién:taron tsi Kaniatarowá:nen ohné:kanos, onen’takén:ra aohnhá:te í:non tánon tewataká:ron, ne ionontá:here aonónhkwa, tánon ne tsonhnhó:wane, né:ne aonawí:ra rotitshén:rion tsi kahnehtón:tion ne Sherbrooke kanatatátie tekontiéston ne teiotshe’tahrí:seron o’tá:ra. Wathró:ris nahò:ten tká:ien nà:kon ne tsi kanatowá:nen ohontsà:ke.
Skátne ótia’ke tsi nón:we. Teiohnitiohtià:kon iakohonkará:wis aionnonhtón:nionhwe tsi ken’ í:iens, iaotahsonterátie tánon tsi tewatatenónhkwe, tewehiá:ra’s tsi niiawénhseron tsi takenhá:tie tánon shékon iónhnhe tsi tewatkáthos ne óhontsa.
Thénon kén:ton ne owén:na
Oratskèn:ta
Iah í:non té:iens ne Karonhiá:ke Tiakoia’tén:en, tiókonte skátne í:tewe’s. Ne akoratskén:ta teiotwatá:se tsi iakona’tón:ni ne owenna’shón:’a ase’ken akaónha tiakotierénhton ne tékeni teiehsí:nonte wa’tion’kenhraré:nia’te ne A’nowara’kó:wa ra’nowá:ke tánon wa’tierí:wahkwe aontehiá:ron ne óhontsa.
Kaniatarowá:nen
Ne kaniá:tara énhsehre teiothé:sonte iotsinonhiatón:ton ieiohkwatá:se tsi na’tewataká:ron tánon é:neken tsi iohóntsare ne ohnà:ken wathró:ris tsi iorihowá:nen tsi tiakóha skátne ne onkweshón:’a ne kénthon tsi kawé:nonte, tánon ó:ni tsi tekákhas tsi kanakerahseraké:ron tsi iotnekáhtention.
Ononhkwa’shón:’a
Kaié:nen tsi ní:ioht ne ioté:wera kontí:tie é:ren nón:we tsi kawé:note nitkonnétha nia’tékon tsi ní:ioht ne óhonte iotehiarón:tie ononhkwa’shón:’a. Iethi’nisténha Óhontsa ionkhiiá:wis akwé:kon, tsi ió:werare tiontenniétha ne ká:nen tatiatiéste tsi iohontsá:te.
Tsáta Nihá:ti Tehatinonniá:khwa
Iotsistohkwarón:nion tóka ni’ Tsáta Nihá:ti Tehatinonniákhwa, ohén:ton í:kate tsi iotsistohkwarón:nion ne tewáhsere tsi nientsitewá:iere. Kén:en tetiatahsón:tere ne tsi karonhià:te tánon ohné:kanos tsi teiothé:sonte niwahsokó:ten, iakothará:ni ne kahonwé:ia rontó:rie’s tánon ronaterién:tare iethisothó:kon ionkhi’nikón:rare.
Tiotién:taron
Tió:ion, iokawe’tserón:ton kontí:teron ne awén:ke teiohkwatasé:ton tsi kawé:note. Iótteron akónhton nia’té:kon e’tho nikaié:rha, tiotién:taron tió:konte kenh nón:we kón:ne’s.
Onen’takén:ra
Tsi io’nhatón:ton ne onen’takén:ra wathró:ris tsi iorihowá:nen ne Rotinonshión:ni raotirihwá:ke. Karonta’kó:wa ne Skén:nen tsi nón:we ne à:kweks ka’nikón:rare, wathró:ris tsi iakohonkará:wis tánon iako’nikón:ra ne ronatenenhraró:ron nà:kon tsi ionha’tón:ton.
Tsi nón:we
Sir George Williams Campus
Hall Terrace, Henry F. Hall Building
1455 De Maisonneuve Boulevard West
Ratiráhstha raotiká:ra
Kaia’tanó:ron Dumoulin Bush
Kaia’tanó:ron Dumoulin Bush
Kaia’tanó:ron Dumoulin Bush Onkwehón:we/O’serón:ni-Canadian naeia’tó:ten, ieráhstha tánon ne thénon aiokén:ton Oshahrehé:’on (Châteauguay), Québec. Iakóhson ne BFA ne Onkwehonwehnéha aiontkátho ratihsáahs né:ne OCAD Ionterihwaienstahkhwa’kó:wa.
CBC, APTN Lumi, tánon Prime Video shakotina’tón:ni ne akoio’ténhsera. Iakotsnié:non ni’ óni aieweienén:ta’ne ne ashakotina’tón:hase ne Tkaronto (Toronto), Tiohtià:ke (Montreal), tánon Aotearó:a (New Zealand).
Tóhkara’ niiohserá:ke ne akoio’ténhsera shakotina’tón:ni "A Treaty Guide for Torontonians" ne 2022 Toronto Biennale, "Jules au Pays d’Asha" ne 2023, "Utipii" ne 2023, "Tumasi et Cam" ne 2025 tánon ne nahé:’a "Ondinnok" ne 2025.
Karáhston: The Art Studio
Hannah Claus
Kenhtè:ke nitiakawé:non ne Hannah Claus | Tyendinaga Mohawks ne Bay of Quinte, ióntstha ne thénon ne tekení:neren ahonwatina’tónhase Kanien’kéha tsi ní:ioht. Ne Claus ieiá:tare tsi ronwatirihonnién:ni ne Kenhtè:ke, Kari’wanóntha tsi nahatí:iere tánon ahonwatiié:nawa’se ne thénon Onkwehonwehnéha ahonteweiénste ne aié:rahste ne tsi Iakoio’ténhstha Aié:rahste ne akoio’ténhsera shakotina’tón:ni ohontsakwé:kon tóhka ní:kon rotí:ien ne ratiró:roks karahstá:nion, ne óni ne National Gallery ne Canada.
Ónen iakoié:nen ne Eiteljorg Fellowship (2019) tánon ne Prix Giverny (2020), tánon ne 2025 Fellow of the Royal Society of Canada. Ne tontié:renhte kwah kowá:nen iakoráhston entre les eaux et les étoiles, enwá:ton iensatkátho ne Centre Sanaag ne Tiohtià:ke. Iéhawe ne Concordia University Research Chair ne Onkwehonwené:ha (New Scholar), tánon ieiá:tare ne ohén:ton ié:iete ne Indigenous Future Research Centre ne Concordia Ionterihwaienstahkhwa’kó:wa.
