Skip to main content

ᑎᓪᓗᑕᕐᓃᑦ: ᐃᓂᓕᐅᕆᓯᒪᒍᑏᑦ ᐃᓄᑐᐃᓐᓇᓂᒃ ᒪᓐᑐᔨᐊᒥ

ᐱᒋᐊᕐᓗᑎᒃ ᐊᐅᒡᒍᓯ 3-ᒥᑦ ᑎᑭᓪᓗᒍ 5, ᐃᓕᓐᓂᐊᕕᕐᔪᐊᑉ Concordia/ᑲᓐᑰᑎᐊᑉ ᑕᑯᑦᓴᐅᕕᐅᒃᑫᕕᖓᑦ FOFA Gallery ᓴᐳᑦᔨᓯᒪᕗᖅ ᓄᓇᕐᖃᑎᒌᑦ ᐱᖏᓐᓂᒃ ᓴᐳᑦᔨᓯᒪᒍᑎᖃᕐᓱᑎᒃ ᓯᓚᒥ ᐊᐅᓚᔫᕐᑎᓯᓂᕐᒥᒃ
July 24, 2017
|
By Ossie Michelin


ᑕᑯᕚᒃᑯᕕᖃᐅᑎᓕᕆᔨ ᐃᓴᐱᐊᓚ ᐅᐃᑖᓗᒃᑐᖅ: “ᖁᕕᐊᓇᕐᑐᒪᕆᐊᓗᒃ ᑕᒪᑐᒥᖓ ᓱᔪᖃᕐᑎᓯᒍᑎᖃᕐᓂᒥᒃ ᐊᑑᑎᔭᖃᕆᐊᒥᒃ ᐃᓄᑐᐃᓐᓇᓄᑦ ᐅᐸᑦᑕᐅᒍᒪᒍᓇᐅᑦᓯᐊᑐᒥᒃ.” ᑕᑯᕚᒃᑯᕕᖃᐅᑎᓕᕆᔨ ᐃᓴᐱᐊᓚ ᐅᐃᑖᓗᒃᑐᖅ: “ᖁᕕᐊᓇᕐᑐᒪᕆᐊᓗᒃ ᑕᒪᑐᒥᖓ ᓱᔪᖃᕐᑎᓯᒍᑎᖃᕐᓂᒥᒃ ᐊᑑᑎᔭᖃᕆᐊᒥᒃ ᐃᓄᑐᐃᓐᓇᓄᑦ ᐅᐸᑦᑕᐅᒍᒪᒍᓇᐅᑦᓯᐊᑐᒥᒃ.” | Ossie Michelin/ᐆᔅᓯ ᒥᓯᓕᓐ


English version
Version française

ᒪᓐᑐᔨᐊᑉ ᐃᓪᓗᒐᓴᖏᑕ ᐃᒻᒧᐊᓂ ᓄᐃᑕᔪᖃᕐᐳᖅ ᐃᓄᑐᐃᓐᓇᓄᓪᓗ ᐃᓄᑐᐃᓐᓇᐅᖏᑦᑐᒐᓴᓐᓄᓗ ᑕᑯᓪᓗᕆᑦᑕᐅᔪᑦᓴᓯᐊᒥᒃ. ᐃᓂᖃᑦᓯᐊᓱᓂ ᑕᑯᑦᓴᐅᑎᑕᐅᔪᒥᒃ ᐃᓕᓐᓂᐊᕕᕐᔪᐊᑉ ᑲᓐᑰᑎᐊᑉ ᓯᓚᑖᓂ FOFA GALLERY-ᐅᑉ, ᐊᑦᔨᖑᐊᖅ ᑕᑯᑦᓴᖅ ᐃᓄᑐᐃᓐᓇᐅᑉ ᐃᓄᑐᖃᐅᑉ ᐊᑦᔨᖑᐊᑕ ᐊᒃᒉᔭᕐᑐᐃᓯᕐᑐᑦ ᖁᓪᓕᒧᑦ, ᐃᓄᑐᐃᓐᓀᑦ ᖃᐅᒻᒪᖁᑎᑦᓴᔭᖓᓄᑦ ᓇᑦᓯᔭᒥᒃ ᐅᕐᓱᒥ ᐅᕐᓱᖃᕐᓱᓂ.

ᐃᓚᐅᔪᑦ ᐊᓪᓚᓯᒪᔪᖕᖑᐃᒍᑎᐅᒪᔪᑦ ᐊᓪᓚᓯᒪᕗᑦ ᒍᐃᒍᐃᑎᑐᑦ, ᖃᓪᓗᓈᕐᑎᑐᑦ ᐊᒻᒪᓗ ᐃᓄᒃᑎᑐᑦ ᐊᓪᓚᓯᒪᑦᓱᑎᒃ, ᑐᓴᐅᒪᔭᐅᑎᑦᓯᓇᓱᒍᑎᐅᑦᓱᑎᒃ ᑎᓪᓗᑖᕐᓃᑦ-ᑯᓐᓂᒃ ᓯᓚᒥ ᐃᓄᑐᐃᓐᓀᑦ ᐊᐅᓚᔫᓕᐊᕕᓂᖏᓐᓂᓗ ᐃᓗᕐᖁᓯᕐᒥᓂᓪᓗ ᓇᓪᓕᐅᓂᕐᓯᐅᕈᑎᖏᓐᓂᒃ ᑐᖕᖓᓱᑦᑎᓯᒍᑎᐅᓛᕐᑐᓂᒃ ᐊᐅᒡᒍᓯ 3-ᑦ ᑎᑭᓪᓗᒍ ᐊᐅᒡᒍᓯ 5 ᐅᕙᓃᓪᓗᑎᒃ FOFA Gallery Courtyard (1515 Ste. Catherine St. W.).

“ᐱᐅᔪᒻᒪᕆᐊᓘᕗᖅ ᐊᐅᓚᔫᓂᒃ ᑕᑯᓐᓇᑕᐅᑎᑦᓯᒋᐅᒍᑎᖃᕐᓂᒥᒃ ᓯᓚᒥ. ᐊᕐᕌᓂ, ᐊᒥᓱᐊᓗᓐᓄᑦ ᐃᓄᓐᓄᑦ ᐱᓱᑦᑐᓄᑦ ᓄᕐᖃᕕᐅᖃᑦᑕᓚᐅᔪᕗᒍᑦ ᓱᓇᓕᑦᑖᒪᖔᕐᑕ ᑐᑭᓯᒍᒪᔪᓄᑦ,” ᓚᑦᓱᓂ ᐅᖃᕐᑐᖅ ᑎᓪᓗᑕᕐᓃᑯᑦ ᐊᑕᐅᑦᓯᑯᕐᑎᓯᔨᖓᑦ ᑲᒪᔨᒋᑦᓱᒍᓗ, ᐃᓴᐱᐊᓚ-ᕉᔅ ᐅᐃᑖᓗᒃᑐᖅ

“ᑕᒪᑐᒥᖓ ᑕᒡᒐᓂ ᐊᕐᕌᒍᑦᑎᓂ ᓂᕆᐅᒻᒥᔪᒍᑦ ᓱᓕ. ᑌᒫᒃ ᐱᓂᐊᕐᓂᖃᕐᓱᓂ ᐅᒃᑯᐃᓯᒍᑎᑦᓯᐊᖑᔪᖅ ᖃᓄᐃᑦᑐᑐᐃᓐᓇᓄᓪᓗ ᐃᓄᓐᓄᑦ ᐃᓚᐅᕕᑦᓯᐊᖑᑦᓱᓂ ᓇᓪᓕᐅᓂᕐᓯᐅᓂᑦᑎᓄᑦ.”


‘ᐃᓄᑐᐃᓐᓇᐅᑉ ᐃᓪᓗᒐᓴᕐᓃᓂᖓᓂᒃ ᓂᑦᑕᐅᒪᑎᑦᓯᒍᑎᑦᓯᐊᖅ’


ᑖᓐᓇ ᐊᑭᓐᓈᓗᑦᓱᓂ ᑕᑯᓐᓇᑕᐅᒐᓱᑦᑐᐸᓗᓲᖑᒻᒥᔪᖅ ᐃᓄᑐᐃᓐᓇᓄᑦ ᐳᓛᕆᐊᕐᓯᒪᔪᓄᑦ. ᐃᓴᐱᐊᓚ-ᕉᔅ ᐅᖃᕐᑐᖅ ᐃᓄᑐᐃᓐᓀᑦ ᑕᑯᓱᕐᓀᓕᐅᓲᖑᒋᐊᖏᑦ ᓄᐃᑕᑎᑕᐅᒍᑎᖃᑦᓯᐊᕆᐊᒥᒃ ᒪᓐᑐᔨᐊᑉ ᐃᓪᓗᒐᓵᓗᖏᑕ ᕿᑎᓪᓗᐊᖓᓂ

ᑖᓐᓇ ᐊᑭᓐᓈᓗᒃ ᓇᑉᐸᑕᐅᒪᔪᖅ ᓇᐸᕕᒋᓚᐅᕐᓯᒪᖕᖏᑕᒥᓂ, ᑕᒐᑕᒐᑦᑕᐅᖅ ᐊᖏᔪᐊᓘᒻᒥᔪᒥᒃ ᐊᑭᓐᓇᒥᐅᑕᑯᑖᖃᓕᕆᕗᒍᑦ ᑕᒫᓂ ᓯᓚᑎᑦᑎᓂ. ᓇᓪᓕᐅᓂᕐᓯᐅᓂᖃᓚᐅᕋᑕᓗᓐᓃᑦ ᓱᓕ ᐃᓄᑐᐃᓐᓇᐅᓂᕗᑦ ᐃᓪᓗᒐᓭᑦ ᐊᑯᕐᖓᓃᓕᕇᕐᑐᖅ,” ᐅᖃᕐᑐᖅ ᐱᔪᕆᒪᐅᑎᖃᕐᓱᓂ ᐃᓴᐱᐊᓚ.

“ᐱᓪᓚᕆᐅᒍᑎᓖᑦ ᐊᕐᕌᓂ ᐊᒥᓱᑦ ᐃᓄᑐᐃᓐᓀᑦ ᐅᐸᐅᑎᓂᕆᓚᐅᔪᔭᖓᓐᓂᒃ – ᙯᒋᐊᓪᓚᓛᖁᑦᓴᖑᐊᕐᑕᕋᓗᐊᒃᑲ ᑕᒃᒐᓂ ᐊᕐᕌᒍᑦᑎᓂ – ᓇᑯᕐᓴᓴᖕᖑᐊᓚᐅᔪᒻᒪᑕ ᑕᑯᔭᐅᕕᑦᓴᒥᓐᓂᒃ ᐃᓂᓕᐅᕐᑕᐅᓂᕆᐊᒥᒃ. ᐃᒫᒃ ᐃᓪᓗᒐᓴᓂ ᐃᓄᑐᐃᓐᓇᓅᓕᖓᔪᓂᒃ ᓱᔪᖃᕐᑎᓯᒍᑎᖃᕐᓂᓂᒃ ᓴᕐᕿᑎᑕᐅᒪᔪᓂᒃ ᐃᓄᑐᐃᓐᓀᑦ ᐱᓪᓗᒋᑦ.”

ᑕᒪᓐᓇᓕ ᔨᐊᓂᕗ ᑑᕐᓄᒧᑦ, ᑐᑭᒧᐊᑦᑎᓯᔨᐊᓄᑦ FOFA Gallery-ᐅᑉ, ᑖᒃᑯᐊ ᑎᓪᓗᑕᕐᓃᑦ, ᑕᒃᒐᓂ ᐊᕐᕌᒍᒥ ᐱᓇᓱᐊᓚᐅᕐᑕᖏᓐᓂ ᐊᓕᐊᓇᕐᓂᐹᖑᓚᐅᕐᖁᑦ. ᐅᖃᓚᐅᕐᓱᓂᓗ ᑕᑯᕙᒃᑯᕕᒻᒥ ᐅᒃᑯᐃᕕᓕᕕᓂᐅᓂᕃᑦᓱᓂ ᐃᓄᑐᐃᓐᓇᓄᑦ, ᐊᓯᖏᓐᓄᓗ ᓄᓇᓕᑐᖃᕐᓄᑦ ᐃᓅᖃᑎᒌᑦᑐᓄᑦ ᓇᐅᓕᒫᓄᓪᓗᒐᓴᒃ

“ᑕᒪᓐᓇ ᖁᕕᐊᓇᕐᓱᓂ ᐱᒐᓱᕝᕕᓴᑦᓯᐊᖑᔪᖅ ᐱᕕᑦᓴᓕᐅᕆᒍᑎᐅᑦᓱᓂ ᖃᓄᐃᑦᑐᑐᐃᓐᓇᓂᒃ, ᑲᑎᖃᑎᒌᑎᑦᓯᓂᕐᒥᒃ ᓄᓇᓕᓐᓂᒃ ᑕᑯᔭᕐᑐᓚᐅᕐᓯᒪᖕᖏᑐᓂᓪᓗ ᑕᑯᒍᒪᓕᕐᑎᓯᓇᓱᓐᓂᐅᓱᓂ ᙯᒐᔭᖕᖏᑐᓂᒃ ᙯᑎᑦᓯᓚᕿᒍᑎᐅᒐᒥ, ᐅᖃᕐᑐᖅ ᔨᐊᓂᕗ.

“ᐃᓱᒪᒋᔭᒃᑯᓕ, ᑕᒪᒃᑯᐊ ᑲᒪᒋᔭᐅᔪᑦᓴᐅᕗᑦ ᐃᓘᓐᓇᖏᓐᓄᑦ ᐃᓗᕐᖁᓯᕐᓅᓕᖓᔪᓂᒃ ᐱᕕᑦᓴᖃᕐᑎᓯᔪᑦᓴᓄᑦ ᑲᓇᑕᒥ ᓱᕐᖁᐃᑐᒥᒃ ᐱᕕᖃᕐᑎᑕᐅᖁᓪᓗᒋᑦ ᓄᓇᓕᑐᖃᕐᓅᓕᖓᔪᓂᒃ ᓄᐃᑕᑎᑦᓯᒍᑎᐅᒍᓐᓇᑐᑦ ᑕᒪᓐᓇᓗ ᑲᔪᓯᔪᒥᒃ ᐱᑕᖃᕐᑎᒐᓱᖏᓐᓇᓲᕆᕙᕗᑦ ᐱᕕᑦᓴᖃᕐᑎᓯᕕᑦᓴᖅ”

‘ᐱᐅᔪᒥᒃ ᓈᒻᒪᓂᖃᑦᓯᐊᑐᒥᒃ ᑭᒡᒐᑐᕈᑎᖃᕐᓂᖅ’

ᑌᒪᓕ ᑎᓪᓗᑕᕐᓃᑦ ᓯᕗᓪᓕᒥ ᐊᐅᓚᔫᓂᒃ ᓇᓪᓕᐅᓂᕐᓯᐅᕈᑎᖃᕐᓂᐅᒐᓗᐊᕐᑎᓗᒍ, ᐃᓴᐱᐊᓚ ᐅᖃᕐᑐᖅ “ᐃᓄᑐᐃᓐᓇᓂᒃ ᓱᔪᖃᕐᑎᓯᒍᑎᖃᕐᓂᐅᓚᕆᒐᔭᕐᑎᓗᒍ” – ᐅᖄᒍᑎᖃᕐᓂᒍᓗᑐᐃᓐᓇᐅᒍᓐᓀᓗᓂ ᓇᓪᓕᐅᓂᕐᓯᐅᕈᑎᖃᕐᓂᑐᐃᓐᓇᐅᒍᓐᓀᓗᓂᓗ ᐃᓄᐃᑦ ᐃᓗᕐᖁᓯᖓᓐᓂᒃ, ᑭᓯᐊᓂ ᐃᓚᐅᓪᓚᕆᕝᕕᐅᓗᓂ ᐊᑑᑎᔭᖃᕐᓂᐅᓗᓂᓗ. ᐱᐅᓯᖃᕐᐸᒐᓗᐊᕐᑎᓗᒋᑦ ᑐᐊᕐᕚᓪᒥᕙᓪᓗᖅ ᓱᔪᖃᕐᑎᓯᓂᖃᕐᓱᑎᒃ ᑭᓯᐊᓂ ᑖᒃᑯᑎᒎᓇ ᐃᓄᐃᑦ 1500 ᒥᑦᓯᑎᓐᓃᑐᑦ ᓄᓇᓯᒪᔪᑦ ᒪᓐᑐᔨᐊᒥ ᐱᑕᖃᕐᒥᒪᑕ. ᐃᓴᐱᐊᓚ ᐅᑉᐱᕈᓱᒍᑎᖃᕐᑐᖅ ᐱᓪᓚᕆᐅᓂᖃᕆᐊᖏᑦ ᑕᒪᑐᒥᖓ ᐊᑑᑎᑎᑦᓯᒍᑎᖃᕐᓃᑦ ᑲᓐᑰᑎᐊᒥ, ᒪᓐᑐᔨᐊᑉ ᕿᑎᓪᓗᐊᖓᓃᑦᑐᒥ.

ᐅᓐᓄᑕᒫᑦ ᐱᒋᐊᖕᖓᕈᑎᖃᖃᑦᑕᓚᖓᔪᒍᑦ ᓂᕿᑐᐃᓐᓇᓂᒃ ᓂᕆᓗᑕ, ᓇᑦᓯᕕᓂᕐᓂᒃ, ᐃᖃᓗᓐᓂᒃ ᐊᒻᒪᓗ ᑐᑦᑐᕕᓂᕐᓂ. ᓂᕆᓇᓱᐊᖃᑎᒌᑦᓯᒪᓕᕐᐸᑕ ᐃᓄᐃᑦ ᐱᖕᖑᐊᕈᓯᖏᓐᓂᒃ ᐱᖕᖑᐊᓂᖃᖃᑦᑕᓚᖓᒻᒥᔪᑦ – ᖁᕕᐊᒋᔭᐅᕙᑦᑐᓂᓪᓗ ᐱᐅᓯᑐᖃᒃᑯᓗ ᐱᖕᖑᐊᕈᓯᕐᓂᒃ ᐃᓄᐃᑦ ᖁᕕᐊᓱᓐᓇᓯᐅᓕᕋᒥᒃ ᐊᑑᑎᓲᑐᖃᖏᓐᓂᒃ. ᐊᐅᓚᔫᑦ ᐃᖏᕐᕋᓯᑎᑕᐅᓚᐅᖕᖏᓂᖏᓐᓂ ᐱᑕᖃᖃᑦᑕᓚᖓᒻᒥᔪᑦ ᑐᓴᕐᓈᑎᑦᓯᔩᓪᓗ ᐅᓂᒃᑳᑐᐊᕐᑏᓗ ᐃᓄᑐᐃᓐᓇᓄᑦ ᑌᒣᓘᕈᓐᓇᑐᓄᑦ ᑐᓵᑎᑦᓯᒍᑎᐅᓗᑎᒃ.

“ᐃᓱᒪᒐᒪᓕ ᐃᓄᐃᑦ ᐊᒥᓱᑦ ᐃᓄᑐᐃᓐᓇᓂᒃ ᐃᓪᓗᒐᓴᕐᒥᐅᓂᒃ ᐃᓱᒪᒋᔭᖃᕈᑎᖏᑦ ᐊᖏᔫᖕᖏᒪᕆᒋᐊᖏᑦ. ᐃᓄᑐᐃᓐᓀᑦ ᐱᕕᑦᓴᖃᕐᕕᓴᖃᕐᓂᖓᑦ ᐃᓪᓗᒐᓴᓂ ᐃᓄᑐᐃᓐᓇᖃᐅᑎᐅᑎᕖᖕᖓᓗᒍᓗ, ᐱᕕᑦᓴᓯᐊᖑᓂᕐᓴᐅᒪᑦ ᐃᓱᐊᕐᓂᓴᒥᒃ ᑐᑭᓯᒪᑦᓯᐊᓇᕐᓂᓴᒥᓪᓗ ᑭᒡᒐᑐᕐᕕᐅᓂᕐᒥᒃ,” ᓚᑦᓱᓂ ᐅᖃᕐᑐᖅ ᑕᕐᕋᓕᒃ ᐹᑦᑐᔩ, ᑲᑕᑦᔭᑎ, ᐅᓂᒃᑲᑐᐊᕐᑎᐅᓱᓂᓗ ᐊᓪᓚᑎᐅᑦᓱᓂᓗ ᑕᑯᑦᓴᐅᓂᖃᓛᕐᓱᓂ ᐊᐅᒡᒍᓯ 4-ᒥ ᑖᒃᑯᓇᓂ ᓇᓪᓕᐅᓂᕐᓯᐅᑐᓂ.

ᐅᑉᐱᕆᔭᖃᕋᒥ ᐃᓄᑐᐃᓐᓀᑦ ᐃᓅᑦᔪᓯᒥᒍᑦ ᓱᔪᖃᕐᑎᓯᒍᑎᒋᒍᓐᓇᑕᖏᑦ ᑭᖕᖒᒪᓇᕆᐊᖏᑦ ᐃᑲᔪᕐᓯᒪᖁᓪᓗᒋᑦ ᐃᓄᑐᐃᓐᓇᓂᒃ ᐃᓄᑐᔪᕆᑦᑌᓕᒋᐊᖃᕐᓂᖏᑎᒍᑦ ᒪᓐᑐᔨᐊᒥ.

“ᐱᓪᓚᕆᐅᓂᖃᕐᒪᑦ ᐃᓄᑐᐃᓐᓇᓄᑦ ᖃᓪᓗᓈᑦ ᓄᓇᖏᓐᓃᑐᓄᑦ ᑌᒣᑦᑐᑎᒍᑦ ᑲᑎᖃᑎᒌᖃᑦᑕᓂᖅ. ᐃᓄᑐᐃᓐᓇᐅᓱᓂ ᑕᕐᕋᒥ ᐱᕈᕐᓴᑐᕕᓂᐅᑦᓱᓂ ᐱᓗᐊᖅ ᐃᓚᐅᕐᖃᔭᕐᓇᑑᔭᓲᖑᖕᖏᒪᑦ, ᐊᓯᒥᓂᓪᓗ ᐃᓄᑐᐃᓐᓇᓂᒃ ᑲᑎᓯᖃᑦᑕᓂᖅ ᐱᐅᔫᑦᓱᓂ. ᐃᓚᐅᔭᕐᑐᓯᒪᓂᖅ ᐃᓄᑐᐃᓐᓇᓅᓕᖓᔪᓄᑦ ᓱᔪᖃᕐᓂᐅᓕᕐᑐᓄᑦ ᑕᑯᔭᖃᕐᓂᓗ ᐊᓯᓂᒃ ᐃᓄᑐᐃᓐᓇᓂᒃ ᓇᓪᓕᐅᓂᕐᓯᐅᑐᓂᒃ – ᖁᕕᐊᓇᕐᑐᒪᕆᐊᓘᒻᒪᑦ.“

 

ᑖᒃᑯᐊ ᑎᓪᓗᑕᕐᓃᑦ ᐊᐅᓚᔫᑎᒍᑦ ᓇᓪᓕᐅᓂᕐᓯᐅᓂᑦ ᐊᑭᖃᖕᖏᑐᒥᒃ ᓱᔪᖃᕐᑎᓯᒍᑎᐅᕗᑦ ᐃᓘᓐᓀᓗ ᑐᖕᖓᓱᖁᔭᐅᕗᑦ. ᐊᑑᑎᔭᐅᓂᖃᖃᑦᑕᓚᖓᔪᑦ ᑲᓐᑯᑎᐊᑉ ᐃᓕᓐᓂᐊᕕᕐᔪᐊᑉ FOFA GALLERY Courtyard-ᖓᓂ ᐊᕐᖁᑎᒥ 1515 Ste. Catherine St. W.)-ᒦᑦᑐᒥ  ᐊᐅᒡᒍᓯ  3, 4 ᐊᒻᒪᓗ 5, ᐱᒋᐊᖕᖓᓗᑎᒃ ᐅᓐᓄᑯᑦ 8:45 ᑎᑭᓪᓗᒍ 11 p.m. ᐅᕙᓃᓪᓗᑎᒃ Sir George Williams Campus. 
 



Trending

Back to top

© Concordia University